Is-sħubija ta’ Malta fl-Unjoni Ewropea kienet ta’
ġid għall-politika ambjentali, iżda pajjiżna għadu lura f’bosta aspetti
ambjentali meta mqabbel mal-bqija tal-Unjoni. Dawn jinkludu l-kwalità tal-arja,
l-immaniġġar tal-iskart u l-użu ta’ enerġija rinnovabbli.
Għalkemm il-Prim Ministru wiegħed li jneħħi
l-impjant tal-enerġija li sejjaħ “fabbrika tal-kanċer”, il-kwalità tal-arja
marret għall-agħar l-aktar minħabba ż-żieda fil-karozzi privati u politika
tat-trasport mhux sostenibbli. L-immaniġġar tal-iskart donnu aktar immaniġġar
ta’ kriżi milli viżjoni fit-tul, u, minkejja xi titjib żgħir, il-Magħtab reġa'
lura għall-intejjen ta' qabel. Jidher ċar ukoll li l-gvern mhuwiex qed iħares lejn
il-ġejjieni f’dak li jirrigwarda l-bini u l-iskart mit-twaqqigħ tal-bini, li
jammonta għal 85 fil-mija tal-volum tal-iskart f’Malta. Filwaqt li ħafna minn
dan jiġi rriċiklat u użat mill-ġdid fi stati membri oħrajn tal-UE, il-Gvern
għad m’għandux pjan sostenibbli koerenti għal Malta. L-użu tal-enerġija
rinnovabbli żdied ftit, iżda Malta għadha ma laħqitx il-miri tagħha għall-2020
u l-pajjiż jiddependi mill-gass mill-Ażerbajġan li jiswa aktar minn
alternattivi oħrajn.
Personalment ili attiv għall-ambjent mid-disgħinijiet.
Kont attiv f'kampanji ta' suċċess kontra l-iżvilupp żejjed, u ħafna mir-riċerka
soċjoloġika tiegħi kkonċentrat fuq il-politika ambjentali b'enfasi fuq
is-sħubija ta' Malta fl-UE. Bħala politiku u kunsillier lokali, dejjem kont fuq
in-naħa tar-residenti. Preżentament qed nieħu sehem attiv ukoll fit-tfassil
tal-politika ambjentali tal-Partit Nazzjonalista. Bħala kandidat
għall-Parlament Ewropew, dawn huma l-proposti ewlenin tiegħi b'rabta
mal-ambjent.
Jien nemmen li għandu jkun hemm klawżoli speċjali
għall-ħarsien tal-ambjent tal-gżejjer żgħar. Pereżempju, il-Valutazzjonijiet
tal-Impatt Ambjentali (fosthom il-valutazzjonijiet tal-impatt soċjali u
tat-traffiku) għandhom ikunu applikabbli wkoll għal żvilupp fuq skala żgħira
b'impatti kumulattivi fuq il-lokalitajiet. Dawn għandhom ikunu applikabbli
f'lokalitajiet li għaddejjin minn bidla rapida minħabba għadd ta' żviluppi fuq
skala żgħira li għandhom effetti kbar pereżempju fuq il-parkeġġ, it-traffiku,
il-konġestjoni, id-dehra tal-orizzont u l-pajsaġġ tat-toroq. Proposti għal
żviluppi bħal dawn għandhom jiġu evalwati kif xieraq qabel jiġu approvati.
Nemmen ukoll li Malta teħtieġ monitoraġġ aħjar tal-istandards
ambjentali sabiex jiġi żgurat li d-direttivi tal-UE jiġu applikati aħjar. Fl-istess
waqt, għandhom isiru sforzi akbar biex jinkisbu fondi tal-UE għat-tnaqqis
tat-tniġġis u l-finanzjament tat-tindif u l-immaniġġar tal-iskart.
Jien nappoġġa wkoll l-isforzi għall-projbizzjoni
tal-plastik b'użu waħdani li tant jagħmel ħsara, per eżempju lill-ħlejjaq marittimi.
Iżda din titlob konsultazzjoni fil-fond biex jiġi żgurat li n-negozji u
l-ħaddiema fis-settur ikunu jistgħu jaqilbu għal mod ta' ħidma sostenibbli,
filwaqt li jinħolqu impjiegi ekoloġiċi.
Ikun ta' ġid għal gżejjer żgħar bħal Għawdex u
Malta jekk l-UE tintroduċi standards għall-ħarsien tas-siġar u l-ispazji
pubbliċi. Dawn jagħtu aktar setgħa lir-residenti, is-soċjetà ċivili u
l-kunsilli lokali biex iħarsu l-wirt naturali u pubbliku tagħhom.
B'rabta mal-innovazzjoni u r-riċerka, Malta għal
darb'oħra għadha lura meta mqabbla mal-bqija tal-Unjoni. Hemm bżonn ta' aktar
fondi nazzjonali u Ewropej f'oqsma bħall-effiċjenza fl-enerġija,
il-konservazzjoni tal-enerġija u l-ħolqien ta' impjiegi ekoloġiċi. Biżżejjed
niftakru li Għawdex għadu kif tilef opportunità biex jingħaqad ma' 26 gżira
Ewropea oħra fit-tranżizzjoni għal enerġija nadifa bl-appoġġ tas-Segretarjat
tal-Kummissjoni Ewropea għall-Enerġija Nadifa għall-Gżejjer tal-UE. Dan kien
diżappunt kbir: għandna nieħdu ħsieb li Malta tapplika għal fondi bħal dawn.
Huwa kruċjali wkoll li nagħrfu li n-negozji
interessati fi tranżizzjonijiet ekoloġiċi u l-ħolqien ta' impjiegi ekoloġiċi
jeħtieġu assistenza u kundizzjonijiet speċifiċi fid-dawl tar-realtà ta' Malta
bħala gżira żgħira. Għal darb'oħra, dan jirrikjedi determinazzjoni kif ukoll
ir-rieda li nsemmgħu leħinna favur kundizzjonijiet għall-gżejjer żgħar li
jistgħu jkunu differenti minn dawk għal pajjiżi akbar. Ikun utli wkoll li
jkollna strutturi ta' finanzjament li jsaħħu l-mikroinvestiment għal
inizjattivi iżgħar f'enerġija rinnovabbli u nadifa, u b'hekk jiġu megħjuna
l-individwi, il-gruppi u l-kunsilli lokali interessati.
Dan l-artiklu deher fil-Mument, 24 ta' Marzu 2019
